Vocabulario de Sobrepuerto.

V. CHARRADAS.

ALREDEDOR DA CHAMINERA.

Hogar 'Casa Batanero', El PuenteA cocina yera o cuarto más gran, o prenzipal en as casas da montaña. Teneba o suelo de losas y o fogar en metá u en un lau. Alredor do fogaril estaban as cadieras pa sentase as presonas y denzima o güeco da chaminera, to negro de follín, d'ande escolgaba o calderizo pa colgar os calderos. O fuego ardeba tol dia, dende mañanas hasta de noches. Se enzendeba de mañanas con unas ramas de buxo y bellas cornizas, dimpués se poneba una güena ralla ta cada lau, pretas tos morillos y a dueña las iba alantando pa que no se apagasen.

En a tizonera abeba un tedero pa alumbrar de noches con as tiedas. A fregadera y a espedera estaban en un rincón da cocina. Dimpués da matazia, os embotidos se colgaban en unas palancas alredor da campana da chaminera pa que se secasen.

Como no abeba luz eletrica en que se feba de noches no se podeba trebajar y tos se reuniban alredor da chaminera, alumbraus por as tiedas u a lampa de carburo. Un rato dimpués de fese de noches se cenaba y se estaba de belada, más larga en invierno que en verano. Allí se charraba de to que s'iba fecho en ixe día y se preparaban as fainas pal otro. O amo yera o que disponeba o trebajo, os otros a callar, namás as mullers se atrebeban a poner pegas. Asina que a chaminera sentiba casi tol año as mismas ordens:

(De invierno a primavera, verano, otoño...)

- "Mañana ibanos d'ir a uscar un par de cargas de yerba enta Isuala, porque casi no en queda en o pajar."

- "Carriaremos una miajeta de leña pa que no nos coja bella nevada sin cosa."

- "Iremos ent'o molino pa moler un par de talegas, antes as mullers tendrez que porgar."

- "Soltaremos o ganau ta Peña y as vacas namás a tomar o sol bel rato."

- "Sacaremos fiemo tos campos que en yay mucho en as cuadras."

- "Charticaremos os marguinazos, as marguins y os fenals, que están llenos de artos y dimpués se amuelan as dallas."

- "En que llegue o ganau logau, feremos dos rebaños y nos excusaremos bel día d'ir pastores. O día que nos toquen, prenzipiaremos a femar por os campos más bajos."

- "Uno tien qu'ir a regar tos güertos pa que no se sequen es jodías y que escarde as yerbas."

- "Prenzipiaremos a dallaras yerbas, aura que paize que el tiempo s'asegura y fa calor."

- "Ya yay trigo segadero, ibanos de fer os vencejos, que denseguida tendremos que emplealos."

- "Carriaremos os fajos ta era pa trillar unos trezenales cada día."

- "Estiaño nos toca sembrar a añada de Lacuna, pal Pilar tiene que estar en a tierra."